ކޮތަރުކޮއްޓަށް 23 މިލިޔަން ރުފިޔާގެ ޓިނު ސުކޫލެއް!

ރާއްޖޭގެ ފުރަތަމަ އެޑިއުކޭޝަން މިނިސްޓަރު ހެންވޭރުގޭ އަހުމަދު ކާމިލް ދީދީގެ ނަންފުޅުގައި ސުކޫލެއް ނެތުމުގެ ފަޅުކަން މި ސަރުކާރުން، އެޑިއުކޭޝަން މިނިސްޓްރީން ފިލުވައި ދިނުމަކީ ތާރީހު ރީތީކޮށް ދިން ކަމެވެ. ހުޅުމާލޭ "ހިޔާ އަވަށް" / ފޭސް ދޭއްގައި ގައި ދިރިއުޅެމުންދާ އެތައް ސަތޭކަ ދަރިވަރުންނަށް ހާއްސަ ސުކޫލެއް އެ އަވަށުގައި އިމާރާތް ކުރެވި ހުޅުވުމަކީ އަދި މާ އުފާވެރި ކަމެކެވެ. ސުކޫލަށް ދިއުމަށް އެ ކުދީންނާއި ބެލެނިވެރީން ކުރި ދިގު، އުނދަގޫ ދަތުރު ނިމުމަކަށް އައުމަކީ ވެސް ލިބުނު ބޮޑު ހިތްހަމަަޖެހުމެކެވެ. ސުކޫލުގެ މަސައްކަތް ނިންމާ އެތަން ހުޅުވައިދެއްވުމަށް ނާއިބު ރައީސް ފައިސަލް ނަސީމާއި އެޑިއުކޭޝަން މިނިސްޓަރު ޑރ. އައިޝަތު އަލީ އެކުއެކީގައި ވަޑައިގަތުމަކީ ހިޔާއަވަށާއި ދަރިވަރުން އަދި މާ އުފާވި ކަމެކެވެ.

އެ ހުރިހާ އުފަަލަކާއެކު ދަރީން ގޮވައިގެން ހިޔާ އަވަށުގެ ބެލެނިވެރީން "ކާމިލް ދީދީ ސުކޫލް" އަށް ދިޔަ ފުރަތަމަ ދުވަހު ދަރިވަރުންނާއި ބެެލެނިވެރީން މާޔޫސް ކޮށްލައިފި އެވެ. ހައިރާންވެ އަންތަރީސް ކޮށްލައިފި އެވެ. ހުރިހާ ދަރިވަރުންނާއި އެ ދަރިވަރުންގެ ބެލެނިވެރީންނަށް އަހައިލެވުނީ އެއް ވާހަކަ އެކެވެ: "މިއަކީ ސުކޫލެއް ހެއްޔެވެ؟ މިގޮތަށް ބަޔަކު ސުކޫލެއް އަޅާފައި ހުއްޓައެއް ދުވަހަކުވެސް ނުދެކެމެވެ!"

"ހިޔާ އަވަށު" ގައި ޕްރީ ސްކޫލުން ފެށިގެން ހަވަނަ ގްރޭޑާ ހަމައަށް ކިޔަވައިދޭން އެޅި ކާމިލް ދީދީ ސްކޫލު ޑިޒައިންކުރީ އެ ރަށުގެ ބެލެނިވެރިކަން އޮތް އެޗްޑީސީންނެވެ. އެ މަސައްކަތް މިދިޔަ މާޗު މަހު، އެސްޖޭ ކޮންސްޓްރަކްޝަން ކުންފުންޏާ ހަވާލުކުރީ 165 ދުވަހުގެ ތެރޭގައި ނިންމާ ގޮތަށެވެ. ނަމަވެސް ޔޫކްރެއިން / ރަޝިޔާ ހަނގުރާމައިގެ ސަބަބުން މަސައްކަތް ނުނިމި ލަސްވީ އެވެ.

ސުކޫލު އިމާރާތް ކުރުމަށް ހަރަދުކުރީ އެޗްޑީސީންނެވެ. ސުކޫލް އިމާރާތުގެ މަސައްކަތް ފެށިފައި ވަނިކޮށް އެޑިއުކޭޝަން މިނިސްޓްރީގެ ވިސްނުން ބަދަލުވެ، އެއް ކޮށީގައި ހަދަމުން ދިޔަ ޕްރީ ސްކޫލުގެ ދެ އިމާރާތުން އެއް ތަން ޕްރައިމަރީ ސްކޫލަށް ބަދަލު ކުރަން ނިންމި އެވެ. އަނެއް ފަޅީގައި ހަދަމުންދާ ޕްރީ ސްކޫލު އަންނަ މަހު ނިމޭނެ ކަމަށް މިނިސްޓްރީން ގެންދަނީ ބުނަމުންނެވެ.

"މި" ނޫހަށް އެނގިފައިވާ ގޮތުގައި އެ ދެ ސްކޫލު ހަދަން 23 މިލިއަން ރުފިޔާ އެޗްޑީސީން ހަރަދު ކުރެ އެވެ. އެތަން ހުންނާނެ ގޮތެއް އަދި ނޭނގެ އެވެ.

ކާމިލްދީދީ ސުކޫލް ހުޅުވުމާއެކު، އެތަން ހުރި ގޮތް ފެނި އެތައް ބަޔަކު ގެންދަނީ ފާޑުކިޔައި ޖޯކު ޖަހަމުންނެވެ. މާލާމާތެއް ނުކުރި ނަމަވެސް 23 މިލިއަން ރުފިޔާ ހަަރަދުކޮށްގެން އެފަދަ ގޮތަކަށް ސުކޫލެއް އިމާރާތް ކުރުމުން އެންމެންގެ ނުރުހުމާއި ފާޑުކިޔުން އެބައޮތެވެ.

"ހުޅުމާލެ އިން ބިން ގަަނެ އެ ބިމުގައި ގެސްޓްހައުސް އެބަ ހެދޭ ވިއްސަކަށް މިލިއަން ރުފިޔާ އަށް. އެކަމަކު މި ދައްކަނީ ހުޅުމާލެއިން ބިން ދީގެން ކުންފުންޏެއް ލައްވާ 23 މިލިއަން ރުފިޔާ ހަރަދުކޮށްގެން ހަދާފައި ހުރި ތަނެއްގެ ވާހަކަ. މިއީ ޓިނު ގުދަނެއް ނޫނީ ހަރުގެއެއް ނޫން..." ހުޅުމާލޭގައި ގެސްޓްހައުސްއެއް ހިންގާ ވިޔަފާރިވެރިއަކު ވިދާޅުވި އެވެ.

ބައެއް މީހުންގެ ނަޒަރުގައި "ކާމިލް ދީދީ ސުކޫލް"ގެ ސިފަ، ބުނެދިނީ މި ސަރުކާރުގެ ފެންވަރެވެ. ސަރުކާރުގެ ވެރީންގެ ވިސްނުން ހުރި ގޮތެވެ. ރައްޔިތުންނަށް ޑެލިވާ ކޮށްދޭން ސަރުކާރުގައި ކެޕޭސިޓީ ހުރި މިންވަރެވެ. ތަައުލީމީ ދާއިރާގެ ބައެއް ބޭފުޅުން ވެސް ވަނީ މިކަމާއި ގުޅޭގޮތުން ވާހަކަ ދައްކާފަ އެވެ.

އެއް ބޭފުޅަކު ވިދާޅުވި ގޮތުގައި އެޑިއުކޭޝަން މިނިސްޓްރީގެ މި އަމަލުން ފުރައްސާރަ ކުރެވުނީ ރާއްޖޭގެ ފަހުރުވެރި ފުރަތަމަ ތައުލީމީ ވަޒީރަށެވެ. ހިދުމަތްތެރި އަހުމަދު ކާމިލް ދީދީއަށެވެ.

"މިއީ އެމަނިކުފާނަށް [އަހުމަދު ކާމިލް ދީދީ] އަށް ކުރެއްވި ފުރައްސާރައެއްތޯ؟" ހުޅުމާލޭގެ ސުކޫލެއްގައި މަސައްކަތް ކުރައްވާ ޓީޗަރަކު ވައިބަރު ގުރޫޕެއްގައި ކުރި ބަހުސެއްގެ ތެރެއިން ލިޔެފައި އޮތެވެ.

ރާއްޖޭގައި ހުރި އެންމެ ބޮޑު، ޖާގަ ތަނަވެސް ސުކޫލްތައް އަދި އެންމެ ރީތި ސުކޫލުތައް ހުރީ ވެސް ހުޅުމާލޭގައެވެ. މިދިޔަ ދައުރުގައި އިމާރާތް ކުރާން ފެށި ބައެއް ސުކޫލުތައް މި ސަރުކާރު ވެރިކަމަށް އައިސް ވެސް ހުޅުވާފައި ވެއެވެ. ރީތި، ޖާގަ ތަނަސް، ހިތްގައިމު ސުކޫލުތައް ހުރި ހުޅުމާލޭގައި މީހުން އާބާދުވާން ފެށި ހިޔާ އަވަށުގައި ހުޅުުވި ފުރުތަމަ ސުކޫލާއެކު ބައެއް މީހުން ހަނދާން ކޮށްދިނީ ކުރީ ސަރުކާރުން ހުޅުމާލޭގައި ހިންގި ހިޔާ މަޝްރޫއުގެ ފްލެޓްތަކަށް މި ސަރުކާރުގެ ވެރީން / ހާއްސަކޮށް ރައީސުލްޖުމްހޫރިއްޔާ އާއި ކެބިނެޓް ވަޒީރުން އޭރު ކުރެއްވި މަލާމާތާއި ޖެއްސެވި ޖޯކްތަކެވެ.

ރާއްޖޭގެ ތާރީހުގައި ހިނގުނު ބޯހިޔާވަހިކަމުގެ އެންމެ ބިޔަ މަޝްރޫއު މި ސަރުކާރުގެ ވެރީން ސިފަކުރީ "ކޮތަރު ކޮށި" ތަކެއްގެ ގޮތުގަ އެވެ. ވެގެން ވާނަމަ އެ ތަންތަން ތަޅާ ބިމާ ހަމަކޮށްލީސް ކަމަށް ރައީސް ސޯލިހާއި މިނިސްޓަރު އަސްލަމް އެތައް ފަހަރަކު ވިދާޅުވި އެވެ. އެތަންތަނަށް ފާޑުވިދާޅުވަމުން ވެރިކަމަށް ވަޑައިގެންނެވި ބޭފުޅުން "ކޮތަރުކޮށީ" ގައި ދިރިއުޅޭ ރައްޔިތުންނަށް މި ދިނީ "ޓިނު ސުކޫލް" އެއް ކަމަށް ބުނެ އެތައް ބަޔަކު ދަނީ ސަރުކާރަށް ފާޑުކިޔަމުންނެވެ.

"ތިޔަށްވުރެ މާލޭގައި ހުންނަ ކަރާ މާރުކޭޓް ވެސް މާ ރީތި،" އެހެން މީހަކު ލިޔެފައި އޮތެވެ.

ހިޔާ ޓަވަރުތަކާއި އިންވެގެން ހަދާފައިވާ ސުކޫލަށް ބޮޑެތި ފާޑުކިޔުންތަކެއް އަމާޒުވެފައިވާއިރު ހަގީގީ ސުވާލަކީ މިއީ އެވެ: ތޭވީސް މިލިއަން ރުފިޔާ ހަރަދު ކޮށްގެން މި ކަހަލަ ސުކޫލެއް ހެދީ ކީއްވެ ހެއްޔެވެ؟ އެވަރުގެ ބޮޑު އަދަދެއް ހޭދަކޮށްގެން ހަދާ ސުކޫލެއް ހުންނަންވީ އެގޮތަށް ހެއްޔެވެ.

މިއީ ސަރުކާރުން ވާހަކަ ދައްކަން ޖެހޭ ކަމެކެވެ. އެޗްޑީސީން ވާހަކަ ދައްކަން ޖެހޭ ކަމެކެވެ. މިވަރުގެ ބޮޑު ހަރަދެއްކޮށްގެން ހަދަން ޖެހޭނީ މިކަހަލަ ސުކޫލެއް ނޫނެވެ. މިހާރުވެސް އެތައް އުނދަގުލަކާއި ދަތީގައި އުޅެމުންދާ ހިޔާ އަވަށުގެ ރައްޔިތުންނަށް އަނެއްކާވެސް މި ކޮށްލީ މަލާމާތެއްތޯ އެ މީހުން ސުވާލު ކުރާނެ އެވެ. ފާޑުވެސް ކިޔާނެ އެވެ. މިއީ މިނެޓަކުން ދަރީން ސުކޫލަށް ފޮނު ވޭނެ ގޮތް ސަރުކާރުން ފަހިކޮށްދީފި ކަމަށް ވިދާޅުވެ މިނިސްޓަރު އައިޝަތު އަލީ ދައްކަވާލާ ވާހަކައަކާއެކު ނިމޭން އޮތް ކަމެއް ނޫނެވެ.

ހަގީގަތަކީ ސުކޫލު ހުރި ގޮތުން ސަރުކާރުންވެ ސް ލަދުގެންފި އެވެ. އެހެން ނޫންނަމަ ނާއިބު ރައީސް ސުކޫލު ހުޅުވަން ވަޑައިގެން ވާހަކަ ހިއްސާކޮށް ރައީސުލްޖުމްހޫރިއްޔާގެ އޮފީހުގެ ރަސްމީ ވެބްސައިޓްގައި ހިމަނާފައިވާ ފޮޓޯ ގެލަރީގައި ސުކޫލު ބޭރުން ފެންނަ ގޮތުގެ އެންމެ ފޮޓޯގަނޑެއްވެސް ހިމަނާލީހެވެ. ހަމަ އެންމެ ގަނޑެއްވެސް ނެތީ އެވެ.