ނަޝީދު ވަކިކުރަން އުޅެނީ ގަވާއިދާ ހިލާފަށް: އާޒިމް

ރައްޔިތުންގެ މަޖިލީހުގެ ރައީސްގެ މަގާމުން މައްޗަންގޮޅީ މެދު ދާއިރާގެ މެންބަރު މުހައްމަދު ނަަޝީދު ވަކިކުރަން މަސައްކަތް ކުރަނީ ގަވާއިދާ ހިލާފަށް ކަމަށް މެދު ހެންވޭރު ދާއިރާގެ މެންބަރު އަލީ އާޒިމް ވިދާޅުވެއްޖެ އެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ މަގާމުން ދުރުކުރަން އެމްޑީޕީގެ ޕާލިމަންޓަރީ ގުރޫޕުން ހުށައެޅި މައްސަލަ އަންނަ އާދިއްތަ ދުވަހު ކުރިއަށް ގެންދެވިދާނެ ކަމަށް މަޖިލީހުގެ އިދާރާއިން މެންބަރުންނަށް މިއަދު ވަނީ އަންގާފައެވެ.

އެކަމަށް އިޝާރާތް ކުރައްވާ "އެކްސް" ގައި ނަޝީދުގެ ޑިމޮކްރެޓްސް ނިސްބަތްވާ އާޒިމް ވިދާޅުވީ އިތުބާރުގެ މައްސަލަ ކުރިއަަށް ގެންދަނީ ގަވާއިދާ ހިލާފަށް ކަމަށެވެ. މި ބާވަތުގެ ކަންކަމެއް ‏ކުޅޭކުޅޭ ކުޅިވަރެއްގެ ގޮތުގައި ނުހެދޭނެ ކަމަށް ވެސް ވިދާޅުވި އެވެ.

"އިއްޔެ އިތުބާރު ‏ނެތް، ޖެހިގެން އައި ހަފްތާގައި އިތުބާރު އެބައޮތް. އަނެއް ‏ހަފްތާގަ އިތުބާރެއް ނެތް! ތިކަމެއް ތިގޮތަކަށް ނުވާނެ،" އާޒިމް ވިދާޅުވި އެވެ.

ނަޝީދުގެ އިތުބާރު ނެތް ކަމުގެ މައްސަލަ ދެވަނަ ފަހަރަށް މަޖިލީހަށް ހުށަހެޅީ އެމްޑީޕީގެ 48 މެންބަރުންގެ ސޮޔާއެކު އެވެ.

މައްސަލަ ބަލަައިގަނެ ރައީސް ނަޝީދަށް ފޮނުވި ނޯޓިސްގެ މުއްދަތު މި ހަފްތާގެ ބުރާސްފަތި ދުވަހަށް ހަމަވާނެ އެވެ. މަޖިލީހުގެ ގަވާއިދު ބުނާ ގޮތުން 14 ދުވަހުގެ ނޯޓިސް ހަމަވެ އެންމެ އަވަހަށް އަންނަ ރަސްމީ ދުވަހެއް ގައި އެ މައްސަލަ ކުރިއަށް ގެންދަން ޖެހެއެވެ.

މަޖިލީހުގެ އިދާރާއިން ބުނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ މަގާމުން ދުރުކުރަން އެމްޑީޕީގެ ޕާލިމަންޓަރީ ގުރޫޕުން ހުށައެޅި މައްސަލައިގެ ނޯޓިސްގެ މުއްދަތު ބުރާސްފަތި ދުވަހަށް ހަމަވާނެ ކަމަށާ އެ މައްސަލަ އަންނަ އާދިއްތަ ދުވަހަށް އެޖެންޑާ ކުރެވިދާނެ ކަން މެންބަރުންނަށް އަންގާފައިވާ ކަމަށެވެ.

ނަމަވެސް އާދިއްތަ ދުވަހުގެ އެޖެންޑާ އަދި ނުނެރެއެވެ.

މަޖިލީހުގެ އާންމު ކޮމިޓީގެ ބައްދަލުވުމުގައި މިހާރު ވަނީ ޖަވާބުދާރީވާން ނަޝީދަށް ބައިގަޑިއިރު ދޭން ފާސް ކޮށްފައެވެ. އެގޮތަށް ފާސްކުރީ ފުނަދޫ ދާއިރާގެ މެންބަރު ހުށަހެޅުއްވި ހުށަހެޅުމަށެވެ. އޭނާ ހުށަހެޅުއްވީ މަޖިލީހުގެ ރައީސަށް ޖަވާބުދާރީ ވާން 30 މިނެޓު ދިނުމަށާއި ކޮންމެ މެންބަރަކަށް ބަހުސް ކުރައްވަން ތިން މިނިޓް ދިނުމަށެވެ.

އެ ހުށަހެޅުން ކޮމެޓީން ފާސްކުރީ ހާޒިރުވެވަޑައިގެންނެވި ހަ މެންބަރުންގެ ތެރެއިން ހަތަރު މެންބަރެއްގެ ތާއީދާއެކު އެވެ. ހުށަހެޅުމާ ދެކޮޅަށް ވޯޓު ދެއްވީ ނަޝީދު ނިސްބަތްވެވަޑައިގަންނަވާ ދަ ޑިމޮކްރެޓްސްގެ ދެ މެންބަރުން ކަމަށްވާ ހުޅުދޫ ދާއިރާގެ މެންބަރު އިލްޔާސް ލަބީބާއި މެދުހެންވޭރު ދާއިރާގެ މެންބަރު އަލީ އާޒިމެވެ.

އެ ދެ މެމްބަރުން 30 މިނެޓުގެ ވަގުތު ދިނުމަށް ދެކޮޅު ހެއްދެވީ އިތުބާރު ނެތް ކަމުގެ މައްސަލައިގައި މަޖިލީހުގެ ގަވައިދުގައިވާ ގޮތުން ތިން ގަޑިއިރަށް ވުރެ ދިގުނުވާނެހެން ބަހުސް ކުރިއަށް ގެންދެވޭނެ ކަމަށް ކަނޑައަޅާފައި ވާތީ އެވެ. އެ މިންވަރަށްވުރެ ވަގުތު އިތުރު ކުރަން ދެ މެމްބަރުން ބާރު އެޅުއްވި އެވެ.