ހިޔާނާތުގެ މައްސަލަތަކާ ގުޅިގެން ފުލުހުން އެފްއޭއެމްއަށް ވަދެއްޖެ

ހިޔާނާތުގެ މައްސަލަތަކާ ގުޅިގެން ހިންގާ ތަހުގީގަށް ހެކި ހޯދަން ފުލުހުން ފުޓްބޯޅަ އެސޯސިއޭޝަން އޮފް މޯލްޑިވްސް ( އެފްއޭއެމް) އަށް ވަދެއްޖެ އެވެ.

ފުލުހުން މި ވަގުތު އެފްއޭއެމް ގައި ހަރަކާތްތެރިވަމުންދާ ކަން އެ އިދާރާ އިން ވެސް ވަނީ ޔަގީން ކޮށްދީފައެވެ. ފުލުހުން އެފްއޭއެމަށް ވަދެފައި ވަނީ އެ އެސޯސިއޭޝަނަށް ބޭރުން ލިބުނު ފައިސާ ނަހަމަ ގޮތުގައި ބޭނުން ކުރި ކަމަށް ތުހުމަތު ކުރެވޭ މައްސަލަ އެއްގައެވެ.

ފުލުހުން ބުނީ އެފްއޭއެމްގެ މާލީ މުއާމަލާތްތަކާއި ގުޅޭ ޖިނާއީ ތަހުގީގެއް ހިނގަމުންދާ ކަމަށެވެ. އެ ތަހުގީގު ހިނގަމުންދަނީ ޕްރޮސެކިއުޓަރު ޖެނެރަލް (ޕީޖީ) އޮފީހުގެ އެންގުމަކަށެވެ.

އެފްއޭއެމަށް ފުލުހުން ވަނީ އެ ތަހުގީގަށް ހެކި ހޯދުމަށް ކަމަށް ފުލުހުން ބުންޏެވެ. އެފްއޭއެމަށް ވަނީ ކޯޓުން އަމުރެއް ވެސް ހޯދަައިގެންނެވެ.

މި މައްސަލައާ ގުޅިގެން ޕީޖީ އޮފީހުން ދެންމެ ބުނީ ފުޓްބޯޅަ އެސޯސިއޭޝަން އޮފް މޯލްޑިވްސްއަށް އެކި ފަރާތްތަކުން ދޭ ފައިސާއަށް އެ އެސޯސިއޭޝަންގެ އިސްވެރިން ހިޔާނާތްތެރިވެ އިތުރު ކުށުގެ އަމަލުތައް ހިންގާ ކަމަށް ތުހުމަތުކުރެވޭ މައްސަލައިގެ ތަހުގީގެއް ހިންގަން ފުލުހުންގެ މައްޗަށް އަމުރު ކޮށްފައިވާ ކަމަށެވެ.

ބަޔާނެއް މެދުވެރިކޮށް އެ އަމުރު ކުރި ސަބަބު ވެސް ޕީޖީން ވަނީ ސާފުކޮށް ދީފައެވެ. 

ޕީޖީގެ ބަޔާނުގައި ބުނެފަައިވަނީ ދިވެހިރާއްޖެ އަކީ ބޭރު ގައުމުތަކާއި ބައިނަލްއަގްވާމީ ޖަމިއްޔާތަކާ ގާތް ގުޅުމެއް ބާއްވާ ގައުމަކަށްވެފައި އެ އިދާރާތަކުގެ އިތުބާރާއި ޔަގީންކަން ރާއްޖޭގެ ދައުލަތުގެ މުއައްސަސާތަކަށް އަބަދުމެ ލިބިފައި އޮތުމާއި އެ ކަންކަން އެ މަގަށް ހިނގުމަށްޓަކައި ދައުލަތުގެ އިދާރާތަކުގެ ނަޒާހާތްތެރިކަމާއި އިންސާފުވެރިކަން އަބަދުމެ ކަށަވަރުވެފައި އޮންނަން ޖެހޭ ކަމަށެވެ. އެއީ މުޅި ދިވެހި ދައުލަތުގެ ގައުމީ މަސްލަހަތާ ސީދާ ގޮތުން ގުޅުން ހުރި ކަމަކަށް ވާތީ، ރާއްޖެއާ މުއާމަލާތްކުރާ ބައިނަލްއަގްވާމީ އިދާރާތަކުން ވަކި ހަމަތަކާއި އުސޫލުތަކެއްގެ ދަށުން ފޮނުވާ ފައިސާ އެ ކަމަށް ރާއްޖޭގައި ހެދިފައިވާ އުސޫލުތަކާއި ގާނޫނުތަކާ ހިލާފަށް ކުށްކުރުމަށް ނުވަތަ ކުށްކުރުމަށް ފަހިވާ ގޮތަށް ބޭނުން ކުރެވޭކަމުގެ ތުހުމަތެއް އޮތުމަކީ ޕްރޮސިކިއުޓަރު ޖެނެރަލް ކަންބޮޑުވެވަޑައިގަންނަވާ ކަމެކެވެ.

އެގޮތުން ފުޓްބޯޅަ އެސޯސިއޭޝަން އޮފް މޯލްޑިވްސްއަށް އެކި ފަރާތްތަކުން ދޭ ފައިސާއަށް އެ އެސޯސިއޭޝަންގެ އިސްވެރިން ހިޔާނާތްތެރިވެ އިތުރު ކުށުގެ އަމަލުތައް ހިންގާ ކަމަށް ތުހުމަތުކުރެވޭ މައްސަލައިގެ އެއްވެސް ހިސާބެއް ގައި މަނީ ލޯންޑަރިންގާއި ވައްކަމާއި ހިޔާނާތާއި މަކަރާ ހީލަތުގެ ނުވަތަ އެ ނޫން ވެސް ޖިނާއީ ކުށެއްގެ މައްސަލައެއް ހިނގަމުންދާނަމަ އެ ކަމެއް ތަހުގީގު ކޮށް އެ މައްސަލައިގައި ދައުވާއެއް ކުރެވެން އޮތް ބައެއްގެ މައްޗަށް ދައުވާ ކުރުމަށް ޕީޖީ އޮފީހަށް ފޮނުއްވުމަށް އަމުރު ކޮށްފައިވާ ކަމަށް ބުންޏެވެ.