ކަނޑުހުޅުދޫ ދޯންޏަކުން ފަލަސްތީނަށް 50،000ރ. ދެނީ

ގ.އ. ކަނޑުހުޅުދޫގެ މަސް ދޯންޏަކުން ފަލަސްތީނުގެ ރައްޔިތުންނަށް ބައިލައްކަ ރުފިޔާގެ އެހީއެއް ދޭން ނިންމައިފި އެވެ. 

ފަލަސްތީނުގައި ހާލުގައި ޖެހިފައިވާ ރައްޔިތުންނަށް އެހީތެރިކަން ފޯރު ކޮށްދިނުމުގެ ގޮތުން މަސްވެރި ކަނޑުހުޅުދޫގެ "ސީހޯސް 3" ބައިލައްކަ ރުފިޔާ ހަދިޔާ ކުރަނީ ފަޅުވެރިންގެ ފަރާތުންނެވެ. އެ މީހުން ހަދިޔާ ކުރަނީ އެ ދޯނިން މިދިއަ ހަފުތާގައި ބޭނި 50 ޓަނުގެ މަހުން ދެ ޓަނުގެ މަހުގެ އަގަށް ފައިސާ އެވެ. ދެ ޓަނުގެ މަހަށްވާ ފައިސާގެ އަދަދަކީ 50،000ރ. އެވެ.

"ސީހޯސް 3" އިން  ފަލަސްތީނަށް 50،000ރ. ދޭއިރު އެ އަތޮޅު ވިލިނގިލީގެ ދެ ދޯންޏަކުން ވެސް ފަލަސްތީނަށް އެހީވާން ވަނީ ނިންމާފަ އެވެ. އެގޮތުން އެއް ޓަނުގެ މަސް ކިރައިގެން ލިބުނު 25،000ރ. ހަދިޔާ ކުރަން ވިލިނގިލީގެ "ހުސީނާ" ދޯނިން ނިންމާފައި ވާއިރު. އެ ރަށުގެ "ކަރައްވައްތާ" ދޯނިން ވެސް އެއް ޓަނުމަހުގެ އަގަށްވާ 25،000ރ. ފަލަސްތީނަށް ހަދިޔާ ކުރަން ނިންމާފަ އެވެ.

މި މަހުގެ ހަތް ވަނަ ދުވަހުން ފެށިގެން އިޒްރޭލުން ފަލަސްތީނަށް ދޭން ފެށި ހަމަލާތައް ހުއްޠާ ނުލާ ކުރިޔަށް އާއިރު މިހާތަނަށް ފަލަސްތީނުގެ 2،300 އަށް ވުރެ ގިނަ މީހުން ވަނީ މަރުވެފަ އެވެ. އަދި8500 އަށް ވުރެ ގިނަ މީހުން ވަނީ ޒަހަމްވެފައި ވެއެވެ