ނަޝީދު ވަކިިކުރަން އުޅެނީ އިންތިހާބީ ރައީސް ހުވާ ކުރުމަށް ހުރަސް އަޅަން: އާޒިމް

ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ މަގާމުން ދުރުކުރަން ހުށައަޅަން އެމްޑީޕީގެ ޕާލިމަންޓަރީ ގުރޫޕުން ނިންމި ނިންމުމަށް ފާޑު ވިދާޅުވެ އެކަމުގެ ބޭނުމަކީ އިންތިހާބީ ރައީސް ހުވާ ކުރުމަށް ހުރަސް އެޅުން ކަމަށް މެދު ހެންވޭރު ދާއިރާގެ މެންބަރު އަލީ އާޒިމް ވިދާޅުވެއްޖެ އެވެ.

މަޖިލީހުގެ ރައީސް ކަމުން ނަޝީދު ވަކިކުރަން އެމްޑީޕީގެ ޕީޖީ ގުރޫޕްގެ މެންބަރުން ނިންމީ އާ ރަށުގައި މިއަދު ބޭއްވި ބައްދަލްވުމުގައެވެ. އެ ބައްދަލްވުމުގައި 40 މެންބަރުން ބައިވެރިވި އެވެ. އޭގެ ތެރެއިން 39 މެންބަރުން ވަނީ ނަޝީދު މަގާމުން ދުރުކުރަން ތާއީދުކޮށްފައެވެ. އަދި ވަގުތުން އިތުބާރު ނެތް ކަމުގެ މައްސަލާގައި ސޮއި ކުރަން ވަނީ ފަށާފައެވެ. 39 މެންބަރުން ވަނީ ސޮއިކޮށްފައެވެ.

އެ ނިންމުމަށް ފާޑު ވިދާޅުވެ އާޒިމް ވިދާޅުވީ އެކަމުގެ ބޭނުމަކީ އިންތިހާބީ ރައީސް ހުވާ ކުރުމަށް ހުރަސް އެޅުން ކަމަށެވެ.

"ބޭނުމަކީ އިންތިހާބީ ރައީސް ހުވާ ކުރުމުގެ ކަންކަމަށް ހުރަސް އެޅުން،" ނަޝީދު ވަކިކުރަން ކުރާ މަސައްކަތާއި ގުޅިގެން އާޒިމް ވިދާޅުވި އެވެ.

ގާނޫނުއަސާސީގެ 114 ވަނަ މާއްދާގައި ބުނަނީ ރައީސުލްޖުމްހޫރިއްޔާގެ މަގާމަށް އިންތިހާބުވާ މީހަކު އަދި ރައީސުލްޖުމްހޫރިއްޔާގެ ނައިބުކަމަށް ކަނޑައަޅާފައިވާ މީހަކު މަގާމާ ހަވާލުވުމުގެ ކުރިން މަގާމުގެ ހުވާކުރަން އޮންނަނީ ރައްޔިތުންގެ މަޖިލީހުގެ ޖަލްސާއެއް ގައި ކަމަށެވެ. އެ ޖަލްސާ ބޭއްވުމުގެ ތައްޔާރީތައް މަޖިލީހުގެ އިދާރާ އިން ދަނީ ކުރަމުންނެވެ.

މިއަދުގެ ބައްދަލްވުމުގައި ބައިވެރިވި މެންބަރަކު "މި" ނޫހަށް ވިދާޅުވީ ވީހާވެސް އަވަހަށް އެ މައްސަލަ މަޖިލީހަށް ހުށައަޅާނެ ކަމަށެވެ. އަދި އުންމީދަކީ ވަރަށް އަވަހަށް ނަޝީދު މަގާމުން ދުރުކުރުން ކަމަށެވެ.

"ހުރިހާ މެންބަރުންގެ ރޫހަކީ ވެސް މަޖިލީސް ހަމަމަގަށް އެޅުވުން. [ރައީސް] ނަޝީދު އެތާންގައި [ރިޔާސަތުގައި] އިންނަވައިގެން އެކަން ކުރެވޭ ކަށް ނެތް. އެހެންވީމަ އަޅުގަނޑުމެން 39 މެންބަރުން މި އިއްތިފާގު ވީ ވީހާވެސް އަވަހަށް ނަޝީދު މަގާމުން ދުރުކުރުމަށް ހުށައެޅުމަށް،" ދެކުނަށް ނިސްބަތްވާ އެމްޑީޕީގެ މެންބަރަކު ވިދާޅުވި އެވެ.

ނަޝީދު މަގާމުން ވަކިކުރުމަށް މީގެ ކުރީން ވެސް މަޖިލީހަށް ހުށައެޅި އެވެ. އެ ފަހަރު މައްސަލަ ހުށައެޅީ 54 މެންބަރުންގެ ސޮޔާ އެކުއެވެ. އެ މައްސަލަ ނުނިންމާ ނާއިބު ރައީސްގެ މަގާމުން އީވާ އަބްދުﷲ ވަކިކުރަން ވެސް ހުށައެޅި އެވެ. އެހެން ކަމުން މަޖިލީހުގެ ރިޔާސަތުގައި އިންނަވާނެ ބޭފުޅަކާމެދު ސުވާލު އުފެދި ޖަލްސާތައް ހުއްޓުމަކަށް އައެވެ.

ރިޔާސީ އިންތިހާބުގެ ދެވަނަ ބުރުގައި ޑިމޮކްރެޓްސްގެ ތާއީދު ހޯދުމަށް އެމްޑީޕީން ވަނީ ނަޝީދާއި އީވާގެ މައްސަލަ ވެސް އަނބުރާ ގެނެސްފައެވެ.

މަޖިލީހުގެ ރައީސް މަގާމުން ދުުރުކުރަން ބޭނުންވަނީ 44 މެންބަރުންގެ ވޯޓެވެ. އެ އަދަަދަށް ވުރެ އިތުރަށް އެމްޑީޕީގައި މެންބަރުން އެބަ ތިއްބެވެ. އެ ޕާޓީގެ މެންބަރުންގެ އަދަދަކީ 54 އެވެ.