ޔާމީންގެ ހައްގުގައި މުއިއްޒަށް ވޯޓުދީ: މެޑަމް ފާތުން

ޖަލުގައި ހުންނެވި އިދިކޮޅު ލީޑަރު އަބްދުﷲ ޔާމީން އަބްދުލްގައްޔޫމްގެ ހައްގުގައި ޕީއެންސީގެ ރިޔާސީ ކެންޑިޑޭޓް ޑރ. މުއިއްޒުއަށް ވޯޓް ދެއްވުމަށް ރައީސް ޔާމީންގެ އަނބިކަނބަލުން ފާތިމަތު އިބްރާހިމް އެދިވަޑައިގެންފި އެވެ.

އެކަމަނާ އެކަމަށް އެދިވަޑައިގެންނެވީ އާންމު ކުރެެއްވި ވީޑީއޯ މެސެޖެއްގައެވެ.

މެޑަމް ފާތިމަތު އިބްރާހިމްގެ މެސެޖުގައި ރައީސް ޔާމީންގެ ގައުމީ މަސައްކަތްޕުޅު ފާހަގަކުރައްވާ އެ މަސައްކަަތް ކުރިއަށް ގެންދަން އަދި އެ މަސައްކަތު ގައި ބައިވެރިވުމަށް ރައްޔިތުންނަށް މިވަގުތު ކޮށްދެވޭނެ އެންމެ ބޮޑު މަސައްކަތަކީ ހޮނިހިރު ދުވަހުގެ އިންތިހާބުގައި މުއިއްޒަށް ވޯޓް ދެއްވުން ކަމަށެވެ.

"ރައީސް ޔާމީންގެ މިނިވަންކަމާ މި ވޯޓާ ވަނީ ގުޅިފައި. ތިޔަ ބޭފުޅުން ޑރ. މުއިއްޒަށް ދެއްވާ ވޯޓަކީ ރައީސް ޔާމީނަށް އިންސާފުވެރި އަވަސް ޝަރީއަތެއް ލިބި އެ މަނިކުފާނު ލިިބިގެންދާ އަނިޔާއިން ސަލާމަތްވާން އޮތް އެންމެ ފަހި މަގު،" ފާތުންގެ މެސެޖެއްގަައި ވިދާޅުވި އެވެ.

ވީޑިއޯ މެސެޖެއް މެދުވެރި ކުރައްވާ މުއިއްޒަށް ވޯޓް ދެއްވުމަށް ރައީސް ޔާމީންގެ އަނބިކަނބަލުން އެދިވަޑައިގެންނެވިއިރު އެކަމަނާ ވަނީ މުއިއްޒުގެ ކެމްޕެއިން ގައި ރަސްމީކޮށް ބައިވެރިވެވަޑައިގެންފައެވެ. 

ފާތުން އަކީ ރައީސް ޔާމީންގެ ސަރުކާރުގައި ވަރަށް ހަރަކާތްތެރިވި ބޭފުޅެކެވެ. 2018 ގެ ރިޔާސީ އިންތިހާބުގެ ކެމްޕެއިން ގައި ވެސް ފާތުން ވަނީ ވަރަށް ހަރަކާތްތެރި ދަަައުރެއް އަދާކުރައްވާފައެވެ.