ދުވަހެއް ވިއްޔާ ދުވަހަކަށް ސައުދީ ދަނީ އިޒްރޭލާ ކައިރިވަމުން: މުހައްމަދު

އަރަބި ގައުމުތައް އިޒްރޭލާ ގުޅުން ބަދަހި ކުރުވަން އެމެރިކާ އިސްވެ ހިންގާ "ނޯމަލައިޒޭޝަން ޕްރޮގްރާމް" ގެ ތެރެއިން ސައުދީ އަރަބިއްޔާ އާއި ޔަހޫދީ އިޒްރޭލާ ދެމެދުގެ ގުޅުން އަރަބި އެހެން ގިނަ ގައުމުތައް ފަދައިން ރަނގަޅުވެ، "ނޯމަލައިޒޭޝަން ޕްރޮގްރާމް" އާ ގާތަށް ޖެހެމުން އަންނަ ކަމަށް ސައުދީ ބާރުގަދަ ވަލީއަހުދު އަދި ބޮޑުވަޒީރު މުހައްމަދު ބިން ސަލްމާން (އެމްބީއެސް) ވިދާޅުވެއްޖެ އެވެ.  

ޕްރިންސަ ވިދާޅުވީ އާދައިގެ ގޮތެއްގައި އެ ގުޅުން އުފެދެމުން ދަނީ ގަލްފުގެ އެހެން ގައުމުތަކުން ވެސް އެމެރިކާގެ އަތްބާރު އެޅުމާއެކު ނޯމަލައިޒޭޝަން ޕްރޮގްރާމާ ކައިރިއަށްދާ މިންގަނޑުގައި ކަމަށެވެ. 

"ދުވަހެއް ވިއްޔާ ދުވަހަކަށް އަޅުގަނޑުމެންގެ ގުޅުން ބަދަހިވެ ކައިރިވަމުން ދަނީ،" އެމެރިކާގެ ބްރޯޑްކާސްޓަރު، "ފޮކްސް ނިއުސް" އަށް ޕްރިންސް މުހައްމަދު ދެއްވި އިންޓަވިއުއަކާ ހަވާލާދީ ރޮއިޓާސްއިން ބުނެފައި ވެއެވެ. 

އެމްބީއެސްގެ ނަމުން މަޝްހޫރުވެ ވަޑައިގެންފައިވާ ބާރު ގަދަ ވަލީއަހުދު މި އިންޓަވިއު ދެއްވާފައި ވަނީ އެމެރިކާގެ ރައީސް ޖޯ ބައިޑަންގެ ވެރިކަމުގައި މެދުއިރުމަތީން އެންމެ ކައިރި އެކުވެރިންގެ މެދުގައި ތާރީހީ ގުޅުންތަކެއް ގާއިމް ކުރުމުގެ މަސައްކަތް ކުރިއަށްދާ ދަނޑިވަޅެއްގަ އެވެ.

އެމެރިކާ ބާރު އަޅައި، އިޒްރޭލާ ގުޅުން ބަދަހި ކުރުމުގެ "ނޯމަލައިޒޭޝަން ޕްރޮގްރާމް" އަކީ ފަލަސްތީނަށް އިޒްރޭލުން ލިބިދާނެ ލުއިތަކުގެ އިތުރުން އެމެރިކާގެ މަސްލަހަތަށް މެދު އިރުމަތީން ބޭނުންވާ ސަލާމަތީ ޔަގީން ކަމާއި ސައުދީން އެދިފައިވާ މަދަނީ ނިއުކްލިއާ އެހީތެރިކަމާ ބެހޭ މަޝްވަރާތައް ވެސް ހިމެނޭ ވާހަކަތަކެކެވެ.

ނޯމަލައިޒޭޝަން އެގްރީމެންޓަކުން ކުރާނީ ކޮން ކަމެއްތޯ ދެންނެވުމުން ޕްރިންސް މުހައްމަދު ފޮކްސްގެ ހާއްސަ ރިޕޯޓަކަށް ދެެއްވި އިންޓަވިއުގައި ވިދާޅުވެފައި ވަނީ ފަލަސްތީނުގެ މައްސަލައަކީ ރިޔާދަށް "ވަރަށް މުހިންމު" މައްސަލައެއް ކަމަށެވެ. "އެ ބައި ކޮންމެހެން ވެސް ހައްލު ކުރަން ޖެހޭ،" ކަމަށެވެ.

"އަޅުގަނޑުމެނަށް އެނގޭނެ އަޅުގަނޑުމެން ދާންވީ ކޮންތާކަށް ކަން. އަޅުގަނޑުމެން އުންމީދު ކުރަނީ އެކަމެއް އެ ތަނަކަށް ވާސިލް ވާނެ ކަމަށް، އެއީ ފަލަސްތީނު ރައްޔިތުންގެ ދިރިއުޅުމަށް ލުއި ލިބޭނެ ކަމެއް، އަދި މެދުއިރުމަތީގައި ބައިވެރިޔަކަށް އިޒްރޭލު ވާނެ،"

އެމެރިކާގެ އޮފިޝަލުން ވަނީ 2024 ވަނަ އަހަރުގެ ނޮވެމްބަރު މަހު ބައިޑަން ދެވަނަ ދައުރަކަށް އިންތިހާބުވެ ވަޑައިގަތުމަށް މަސައްކަތް ކުރައްވާއިރު، ހާރިޖީ ސިޔާސަތުގެ ތެރެއިން މެދުއިރުމަތީގައި ހަދާ މެގަ ޑީލެއްގެ ސަބަބުން އިންތިހާބުން މޮޅުވާން ލިބިދާނެ ފައިދާތަކުގެ ވާހަކަ ދައްކާފަ އެވެ.

އަނެއްކޮޅު ޕްރިންސް މުހައްމަދު ވިދާޅުވެފައި ވަނީ އީރާނަށް ނިއުކްލިއާ ހަތިޔާރު ލިބޭ ނަމަ ސައުދީ އަރަބިއްޔާއަށް ވެސް "އެއްޗެއް ހޯދެން ޖެހޭނެ" ކަމަށެވެ.

ސައުދީ އަރަބިއްޔާއަކީ ޒަމާނުއްސުރެ އީރާނާ ދެކޮޅު ގައުމަކަށް ވެފައި އޮތް ނަމަވެސް މިދިއަ މާޗް މަހު އަލުން ސިޔާސީ ގުޅުން ގާއިމް ކުރުމަށް ރިޔާދާއި ތެހެރާނުން އެއްބަސްވި ފަހުން ދެ ގައުމުގެ ގުޅުން ވަނީ ބޮޑުތަނުން ރަނގަޅުވެފަ އެވެ.

އީރާނު ނިއުކްލިއާ ހަތިޔާރު ހޯދައި ގެންފައިވާ ކަމަށް ދުނިޔެ ބުނާ ބުނުން ތެހެރާނުން ދޮގު ކުރި ނަމަވެސް، އެ ގައުމުގެ ނިއުކްލިއާ ޕްރޮގްރާމް ބައިނަލްއަގްވާމީ ޝައްކުތަކުގެ ތެރޭގައި އޮންނަތާ އަހަރުތަކެއް ވެފައި ވެއެވެ. އަދި އެއީ ހަގީގަތެއް ވެސް މެއެވެ.

ޕްރިންސް ވަލީއަހުދުގެ މި ވާހަކަތައް ނުކުތީ މެދުއިރުމަތީގެ ޖިއޯޕޮލިޓިކްސް އަލުން ބައްޓަން ކުރެވިދާނެ ގޮތަކާމެދު އިޒްރޭލާއި ސައުދީގެ ނޯމަލައިޒޭޝަނަށް ގުޅިގެން މަސައްކަތް ކުރަން ރައީސް ބައިޑަން އާއި އިޒްރޭލްގެ ބޮޑުވަޒީރު ބެންޖަމިން ނަތަންޔާހޫ އިއްޔެ ބޭއްވެވި ބައްދަލުވުމަކަށް ފަހުގަ އެވެ.

ނިއުކްލިއާ ހަތިޔާރު ހޯދުމުގެ ހުއްދަ އީރާނަށް ދެވެން ނެތް ކަމަށް ވެސް އެ ދެ ލީޑަރުން ވިދާޅުވެފައި ވެއެވެ.