އިންޑިއާ - ކެނެޑާ ހޫނުވެ ކެނެޑާ ޑިޕްލޮމޭޓް ބޭރުވާން އަންގައފި

ކެނެޑާގެ ސިކް ލީޑަރު، ހަރްދީޕް ސިންގް ނިޖާރު މަރާލި މައްސަލާގައި އިންޑިއާ އާއި ކެނެޑާގެ ގުޅުން ވަރަށް ބޮޑަށް ގޯސްވެފައި ވަނިކޮށް ކެނެޑާގެ އިސް ޑިޕްލޮމޭޓަކު އިންޑިއާ ދޫކޮށް ފުރައިގެން ދިއުމަށް އިންޑިއާއިން އަމުރު ކޮށްފައިވާ ކަމަށް އިންޑިއާގެ ފޮރިން މިނިސްޓްރީން ޔަގީން ކޮށްދިފި އެވެ. -- ކެނެޑާގެ އިސް ޑިޕްލޮމޭޓް އިންޑިއިން ބޭރުވާ ދީފައި ވަނީ ފަސް ދުވަހެވެ. 

ނިއުދިއްލީގެ އެ ނިންމުމާ ބެހޭ ގޮތުން އިންޑިއިން ބުނެފައި ވަނީ އެއީ އިންޑިއާގެ އެތެރޭގެ ކަންކަމަށް ކެނެޑާގެ ޑިޕްލޮމެޓުން ތަދައްހުލުވުމާއި އިންޑިއާއާ ދެކޮޅު ހަރަކާތްތަކުގައި ބައިވެރިވުމާ މެދު ކަންބޮޑުވުން އޮތުމުން ނިންމި ނިންމުމެއް ކަމަށެވެ. މި ވާހަކަތައް ބުނެފައި ވަނީ ފޮރިން މިނިސްޓްރީން ނެރުނު ބަޔާނަކުންނެވެ.

މިކަމެއް ހިނގައިގެންފައިވާއިރު ކެނެޑާ އާއި އިންޑިއާގެ ގުޅުން ވަނީ ވަރަށް ބޮޑަށް ގޯސްވެފަ އެވެ. އަދި ކެނެޑާއިން ވަނީ މިއަހަރުގެ ފަހުކޮޅު އިންޑިއާއަށް ރާވާފައި އޮތް ވިޔަފާރީގެ މިޝަން ވެސް ކެންސަލް ކޮށްފަ އެވެ.

އިންޑިއާގެ ޕާންޖާބު ފިޔަވައި އެންމެ ބޮޑު ސިކުންގެ އަބާދީއެއް އޮތީ ކެނެޑާގަ އެވެ. ކެނެޑާގައި ސިކުންގެ މިނިވަން ކަމަށް ތާއީދުކުރާ ޖަމާއަތްތައް އެކުވެލައިގެން ކުރަމުންދާ މުޒާހަރާތަކުގެ ސަބަބުން ބޮޑުވަޒީރު ނަރެންދުރަ މޯދީގެ ސަރުކާރު އަބަދުވެސް އޮންނަނީ ވަރަށް ބޮޑަށް ސިހި ސިހި، އަދި ރުޅިގަދަވެފަ އެވެ.

ކެނެޑާއިން އިއްޔެ ބުނެފައި ވަނީ މިދިއަ ޖޫން 18 ވަނަ ދުވަހު ވަކިވެގަތުމަށް މަސައްކަތް ކުރާ ސިކުން ލީޑަރު ހަރްދީޕް ސިންގް ނިޖާރު، ބްރިޓިޝް ކޮލަމްބިއާގައި މަރާލި މައްސަލައާ އިންޑިއާ ސަރުކާރުގެ އެޖެންޓުންގެ އަތެއް ވެއެވެ. އަދި އެއީ ގަބޫލު ކުރެވޭ ތުހުމަތުތަކެއް އޮތް ކަމެކެވެ.

ނިޖާރު މާރާލީ ސިކުންގެ މިނިވަން ގައުމަކަށް ގޮވާލައި އިންޑިއާގައި ނުރަސްމީ ރިފަރެންޑަމެއް އިންތިޒާމް ކުރައްވަމުން ގެންދަނިކޮށެވެ.

އިންޑިއާއިން ވަނީ ކެނެޑާގެ ތުހުމަތުތަކަކީ މުޑުދާރު އަދި ސިޔާސީ ކޮށްފައިވާ ތުހުމަތުތަކެއް ކަމަށް ބުނެ ނިޖާރުގެ މަރާ އިންޑިއާ ގުޅުވާ ކެނެޑާއިން ދައްކާ ވާކަތައް ދޮގު ކޮށްފަ އެވެ. އަދި ކެނެޑާގައި ހަރަކާތްތެރިވާ އިންޑިއާއާ ދެކޮޅު ފަރާތްތަކާ މެދު ގާނޫނީ ފިޔަވަޅު އެޅުމަށް އިލްތިމާސްތައް ކޮށްފައި ވެއެވެ.

ސިކުންގެ މިނިވަންކަން ނުވަތަ ޚާލިސްތާން ހަރަކާތަކީ އިންޑިއާގައި މަނާ ކޮށްފައިވާ ހަރަކާތެކެވެ. އެ ހަރަކާތާއި އެއާ ގުޅުން ހުރި ޖަމާއަތްތަކަކީ ގައުމީ ސަލާމަތަށް ނުރައްކަލެއްގެ ގޮތުގައި އިންޑިއާގެ އޮފިޝަލުން ދެކެ ވަޑައިގަންނަވަ އެވެ. އެކަމަކު އެ ހަރަކާތަށް ކޮންމެވެސް ވަރެއްގެ ތާއީދެއް އިންޑިއާގެ އުތުރުގެ އިތުރުން ސިކުންގެ ބޮޑު އާބާދީއެއް އޮންނަ ކެނެޑާ އާއި އިނގިރޭސިވިލާތް ފަދަ ގައުމުތަކުގައި އެބައޮތެވެ.

ކެނެޑާގެ ބޮޑުވަޒީރު ޖަސްޓިން ޓްރޫޑޯ އިއްޔެ ގާނޫނު ހަދާ މަޖިލީހުގައި ވިދާޅުވީ ނިޖާރު މަރާލި މައްސަލަ އިންޑިއާގެ ބޮޑުވަޒީރު މޯދީއާއެކު މިދިޔަ ހަފްތާ ދިއްލީގައި ގްރޫޕް އޮފް 20 (ޖީ20) ސަމިޓުގައި ވާހަކަފުޅު ދެއްކެވި ކަމަށާއި އެ ތަހުގީގުގައި އެއްބާރުލުން ދެއްވުމަށް އެދި ވަޑައިގެންފައި ވެސް ވާނެ ކަމަށެވެ.

"ކެނެޑާގެ ބިމުގައި ކެނެޑާގެ ރައްޔިތެއް މަރާލުމުގައި ބޭރުގެ ސަރުކާރަކުން އެއްވެސް ބައިވެރިވުމެއް އޮތުމަކީ އަޅުގަނޑުމެންގެ އިސްތިގުލާލާ ހިލާފުވުން، އެކަމަކީ ބަލައިގަނެވޭނެ ކަމެއް ނޫން،" އޭނާ ވިދާޅުވި އެވެ. "އިންޑިއާ ސަރުކާރަށް އިލްތިމާސް ކުރަން މި މައްސަލައިގެ ފުނަށް ދިއުމަށް ކެނެޑާއަށް އެއްބާރުލުން ދޭން،"

އިންޑިއާގެ ފޮރިން މިނިސްޓްރީން ނެރުނު ބަޔާނެއްގައި ބުނީ ކެނެޑާގެ އެ ތުހުމަތު ބާތިލު ކަމަށެވެ: "މިފަދަ ސާބިތު ނުހިފޭ ތުހުމަތުތަކަކީ ކެނެޑާގައި ހިޔާވަހިކަން ފޯރުކޮށްދީފައިވާ ހާލިސްތާނީ ޓެރަރިސްޓުންނާއި ހަރުކަށި ފިކުރުގެ މީހުން، އިންޑިއާގެ އިސްތިގުލާލާއި ސަރަހައްދުގެ އެއްބައިވަންތަކަމަށް ނުރައްކާ ކުރަމުންދާނެ ކަމެއް،" ބަޔާނުގައި ވެއެވެ.

ކެނެޑާގައި އޮތް ސިކުންގެ އާބާދީގައި 770،000 އަށް ވުރެ ގިނަ މީހު އުޅެ އެވެ. އެއީ އެ ގައުމުގެ ޖުމްލަ އާބާދީގެ ގާތްގަނޑަކަށް ދެ ޕަސެންޓެވެ.