91 މިލިއަން ރުފިޔާގެ ޕްރޮޖެކްޓް ޕޮލްވެކަށް ދިނީ ޓެންޑަރަށް ނުގެންގޮސް

ހޯމް މިނިސްޓަރީން ޕޮލިސް ވެލްފެއާ ކޯޕަރޭޝަން (ޕޮލްވެކް) އާ ހަވާލު ކޮށްފައިވާ 91 މިލިއަން ރުފިޔާގެ ޕްރޮޖެކްޓެއް، ޓެންޑަ ބޯޑަށް ނުގެން ގޮސް ހަވާލު ކޮށްފައިވާ މައްސަލައެއް އޮޑިޓަރު ޖެނެރަލް ހުސައިން ނިޔާޒީ ފާހަ ކޮށް ދެއްވައިފި އެވެ.

އޭނާ ސޮއިކުރައްވާ، ހޯމް މިނިސްޓްރީގެ 2019 ވަނަ އަހަރުގެ އޮޑިޓް ރިޕޯޓެއް މިހާރު ވަނީ ނެރެފަ އެވެ.

މި މަހުގެ 18 ވަނަ ދުވަހު ނެރުނު ރިޕޯޓް ބުނާ ގޮތުން ކ. ހިންމަފުށީގައި ވަގުތީ ޑީރެޑިކަލައިޒޭޝަން ސެންޓަރެއް ހެދުމާއި މާފުށީ ޖަލުގައި 50 ގޮޅި ހަދަން 91،630،429 ރ. ޕޮލްވެކާ ހަވާލު ކޮށްފައި ވަނީ ނޭޝަނަލް ޓެންޑާ ބޯޑަށް ނުގެން ގޮހެވެ.

މި މަސައްކަތްތައް ނެޝަނަލް ޓެންޑާ ބޯޑަށް ހުށަނާޅާ ޕޮލްވެކާ ހަވާލު ކޮށްގެން ކުރިޔަށް ގެންދިއުމަށް ނިންމި ސަބަބާ ތައާރުޒު ވާކަން ފާހަގަ ކުރުމުގެ އިތުރުން ޕޮލްވެކުން އަމިއްލަ ކުންފުންޏަކާ މުޅި މަސައްކަތް ހަވާލުކޮށްފައި ވެއެވެ. ހޯމް މިނިސްޓްރީ އާއި ޕޮލްވެކާ ދެމެދު އެއްބަސްވި އަގަށްވުރެ ދެ މިލިއަން ރުފިޔާ ހެޔޮ ކަމަށް ވެސް އޮޑިޓަރ ޖެނެރަލް ފާހަގަ ކުރައްވަފައި ވެއެވެ.

ކޮމްޕްލަޔަން އޮޑިޓް ރިޕޯޓު ބުނާ ގޮތުން މަސައްކަތްތައް ޕޮލްވެކާ ހަވާލު ކޮށްފައި ވަނީ، އަވަސް ފުރުސަތެއްގެ ތެރޭގައި ނިންމަންޖެހޭ މަސައްކަތް ތަކަށްވާތީ އެވެ. އާންމު އުސޫލުން ބީލަމަށް ލައިގެން ހޮވޭ އާންމު ފަރާތަކަށް މި މަސައްކަތް ހަވާލު ކުރުމަކީ ކުރުން ރައްކާތެރި ކަމެއް ކަމަށް ނުވާތީ އެވެ.

ނަމަވެސް، ޕޮލްވެކާ ހަވާލު ކޮށްފައިވާ ދެ މަސައްކަތް، ޕޮލްވެކުން އަމިއްލަ ކުންފުންޏަކަށް ސަބްކޮންޓްރެކްޓް ކޮށްފައި ވެއެވެ. އަދި ޕޮލްވެކާ ސަބްކޮންޓްރެކްޓަރާ ދެމެދު ވެފައިވާ އެއްބަސްވުމުގައި، ސަލާމަތީ ސަބަބުތަކަށްޓަކައި ވަކިކަމެއް ވަކި ގޮތަކަށް ކުރުން ލާޒިމް ކޮށްފައެއް ވެސް ނުވެ އެވެ. ޕޮލްވެކުން އަމިއްލަ ކުންފުންޏަކާ މުޅި މަސައްކަތް ހަވާލުކޮށްފައިވަނީ، މިނިސްޓްރީ އާއި ޕޮލްވެކާ ދެމެދު އެއްބަސްވި އަގަށް ވުރެ ދެ މިލިޔަން ރުފިޔާ ހެޔޮ ކޮށެވެ.